Gjatë takimeve që po zhvillon me bizneset fason në Durrës, kryetari i PD-së, Sali Berisha ka folur edhe për nxitjen e prodhimit vendas.
Ai tha se do të subvencionojnë çdo bagëti, njësi prodhimi dhe fidane të mbjella në mënyrë që të rritet prodhimi vendas dhe të ulen çmimet.
“Eurostati ka publikuar një studim interesantë. Tregon trendin e çmimeve në Shqipëri 2006-2013 me trendin e çmimit në Shqipëri në vitin 2018-2024 krahasuar me trendet e çmimeve në BE. Ajo që është interesante, është se në ato vite, trendi i çmimeve në Shqipëri ishte në ulje dhe krahasuar me trendin e çmimeve në BE. Vetëm një arsye, prodhimi sepse u mbështet blegtoria, u mbështet bujqësia dhe filluan të profilizohen sipas fushave ku fitohet më shumë, Myzeqeja e tëra po orientohej drejt serave dhe lopëve.
Çfarë u ndodhi? Erdhën këta, ata që sillnin plehrat kimike dhe imputet e tjera bujqësore dy-trefishuan çmimin. U rrit çmimi i barit, nuk e mbante dot më lopën ai dhe ka ndodhur një therje masive e lopëve të racës, e të imëtave. Ne do të subvencionojmë për çdo kokë bagëti, për çdo njësi prodhimi, për çdo fidan të mbjellë. Ne nuk kemi shumë tokë, kemi pak, por me një fertilitet të shkëlqyer. Shqipëria është një vend i bekuar, plot ujëra.
Hidrocentrali i Banjës nuk u ndërtua për energji, ai është hidro-energjetik si kompleks për vaditje dhe energji. Se ai 50 megavat energji prodhon. Por ama në qoftë se investon vadit të gjithë Myzeqenë”, tha Berisha. /gazetajone
