Një ngjarje e rëndë u shënua ditën e djeshme në Lezhë, ku një 35-vjeçar u mor peng dhe u dhunua për shkak të një konflikti të nisur rreth ndërtimit të një hidrocentrali në zonën e Kaçinarit, në Mirditë. Viktima, Dode Gjoka, i cili punon si punonjës sigurie në kantierin ku po ndërtohet hidrocentrali, u mor me forcë nga tre persona dhe më pas u godit në kokë, përpara se të lirohej pranë fshatit Rrasfik.
Sipas dëshmisë së tij, konflikti kishte nisur më herët me tre shtetas nga fshati Tresh i Lezhës, të cilët ishin kundër ndërtimit të HEC-it në zonë. Burime nga grupi hetimor bëjnë me dije se midis tyre kishte pasur debate të ashpra për shkak të qëndrimeve të kundërta ndaj projektit. Përplasja verbale është përshkallëzuar në kërcënime dhe më pas në marrjen peng të Gjokës.
Ngjarja ka ndodhur teksa viktima ndodhej pranë zonës ku po kryhen punimet për hidrocentralin. Pasi është futur me forcë në një automjet, ai është dhunuar fizikisht dhe më pas është lënë i lirë kur policia është vënë në ndjekje të autorëve.
Ndërkohë, tre të dyshuarit janë shpallur në kërkim. Policia ka kryer kontrolle në banesat e tyre, por deri më tani arrestimi i tyre nuk është bërë i mundur. Burimet konfirmojnë se personat në fjalë nuk rezultojnë të kenë precedentë të mëparshëm penalë.
Hetimet po vijojnë për të zbardhur plotësisht rrethanat e ngjarjes dhe për të lokalizuar autorët. Policia e Lezhës bën apel për bashkëpunim me qytetarët për çdo informacion që mund të ndihmojë në kapjen e të shpallurve në kërkim. /gazetajone
