Një bashkim kompanish i përbërë nga OMA + RH DHV + LOLA Landscape Architects + Albanian Investment Construction sh.p.k + Diagonal Projektim & Zbatim sh.p.k është shpallur fituese e konkursit për rijetëzimin e stadiumit ‘Selman Stërmasi”.
Tre të parat janë kompani hollandeze. OMA dhe Lola Landscape janë studio arkitekturore që kanë bërë projektin. RHDHV njihet ndryshe si Royal Haskoning, një kompani hollandeze e konsulencës inxhinierike, e cila po menaxhon tenderin e portit të ri në Porto Romano.
Ndërkohë dy kompanitë e fundit janë kompani shqiptare ndërtimi, që me gjasa do të jenë dhe zbatueset e projektit.
Në fazën finale të Garës Ndërkombëtare për Projekt-Ide Arkitekturore për Rilindjen e Stadiumit “Selman Stërmasi”, ishin 5 skuadrat finaliste, ku OMA u zgjodh fituese.
Skuadrat finaliste prezantuan konceptet arkitektonike për një Stadium krejtësisht të ri sipas standardeve të UEFA-s.
Korporata e Investimeve Shqiptare kishte hapur zyrtarisht garën për rindërtimin e stadiumit “Selman Stërmasi”, në fillim të këtij viti.
Ndërtuesit
Por kush janë kompanitë që do të ndërtojnë stadiumin e ri Selman Stermasi bashkë me paketën e kullave ngjitur me të. Albanian Investment Construction është një kompani shqiptare e themeluar në vitin 2004, ndërkohë që në vitin 2023 realizoi një xhiro prej 3.8 milionë eurosh.
Aksionet e saj zotërohen nga tre ortakë. Alban Peza zotëron 75.52 për qind të aksioneve, Arben Peza ka 6.16 për qind, ndërsa Vilson Ahmeti zotëron 18.32 për qind të kuotave. Ky i fundit ka mbajtur postin e kryeministrit të Shqipërisë në vitet 1991-1992, pas rënies së sistemit komunist.
Kompania e dytë ndërtuese, Diagonal Projektim & Zbatim sh.p.k zotërohet në masën 100 për qind nga Nikolin Jaka, kryetari i Dhomës së Tregtisë. Kjo kompani është themeluar në vitin 2007 dhe për vitin 2023 realizoi një xhiro prej gati 3 milionë eurosh.
Projekti
Projekti i investimit realizohet nëpërmjet një modeli partneriteti. Kompanitë private do të ndërtojnë stadiumin e ri me paratë e tyre sipas modelit të Arenës Kombëtare dhe në këmbim do të kenë të drejtën e ambienteve dhe tokësh përreth, ku do të ngrenë disa kulla.
Stadiumi i ri do të jetë i kategorisë IV të UEFA-s, që do të thotë i gatshëm për të pritur ndeshje të niveleve më të larta, përveç finaleve shumë të rëndësishme që kërkojnë stadium me mbi 50 mijë vende.
“Selman Stërmasi”, i njohur ndryshe edhe si ish-stadiumi “Dinamo”, ndodhet në një prej zonave më të lakmuara të kryeqytetit, “Komuna e Parisit”, dhe investimi në të do të sjellë edhe një rikualifikim të zonës rreth tij për përdorim publik dhe privat./Kapitali.al
Lexo edhe:
Kullat gllabërojnë edhe stadiumin “Selman Stërmasi”, pushtohen hapësirat mbështetëse, BETONI mbretëron kudo
Duka i klaneve të ndërtimit degdis derbin e Tiranës në Vlorë, “Selman Stërmasi” po bëhet gati për kullat e drogës?
Të mërkurën nis lufta? Kulla “futet” në trurin e Putinit: “Çorapi” vjen në Ballkan
